ਬਕਾਇਆ ਕਿਰਾਏ ਲਈ N4 ਨੋਟਿਸ ਮਿਲਿਆ ਹੈ?

N4 ਤੁਹਾਡੇ ਮਕਾਨ ਮਾਲਕ ਦਾ ਇੱਕ ਨੋਟਿਸ ਹੈ ਜੋ ਕਹਿੰਦਾ ਹੈ ਕਿ ਤੁਹਾਡਾ ਕਿਰਾਇਆ ਬਕਾਇਆ ਹੈ। ਇਹ ਬੇਦਖ਼ਲੀ ਨਹੀਂ ਹੈ। ਤੁਹਾਨੂੰ ਇਸ ਉੱਤੇ ਲਿਖੀ ਤਾਰੀਖ਼ ਤੱਕ ਘਰ ਛੱਡਣ ਦੀ ਲੋੜ ਨਹੀਂ, ਅਤੇ ਸਿਰਫ਼ ਲੈਂਡਲੌਰਡ ਐਂਡ ਟੈਨੈਂਟ ਬੋਰਡ ਹੀ ਤੁਹਾਨੂੰ ਜਾਣ ਦਾ ਹੁਕਮ ਦੇ ਸਕਦਾ ਹੈ।

ਤੁਸੀਂ ਭੁਗਤਾਨ ਕਰਕੇ ਇਸ ਨੂੰ ਰੱਦ ਕਰ ਸਕਦੇ ਹੋ

ਜੇ ਤੁਸੀਂ ਨੋਟਿਸ ਉੱਤੇ ਲਿਖੀ ਤਾਰੀਖ਼ ਤੱਕ ਨੋਟਿਸ ਵਾਲੀ ਪੂਰੀ ਰਕਮ, ਨਾਲ ਹੀ ਉਸ ਤੋਂ ਬਾਅਦ ਬਣਦਾ ਹੋਇਆ ਕਿਰਾਇਆ, ਭਰ ਦਿੰਦੇ ਹੋ, ਤਾਂ ਨੋਟਿਸ ਰੱਦ ਹੋ ਜਾਂਦਾ ਹੈ ਅਤੇ ਤੁਹਾਡਾ ਮਕਾਨ ਮਾਲਕ ਤੁਹਾਨੂੰ ਬੇਦਖ਼ਲ ਕਰਨ ਲਈ ਇਸ ਦੀ ਵਰਤੋਂ ਨਹੀਂ ਕਰ ਸਕਦਾ।

ਉਸ ਤਾਰੀਖ਼ ਤੋਂ ਬਾਅਦ ਵੀ, ਜੇ ਤੁਹਾਡੇ ਮਕਾਨ ਮਾਲਕ ਨੇ ਅਜੇ ਬੋਰਡ ਨੂੰ ਅਰਜ਼ੀ ਨਹੀਂ ਦਿੱਤੀ, ਤਾਂ ਤੁਹਾਡੀ ਸਾਰੀ ਬਕਾਇਆ ਰਕਮ, ਉਸ ਤੋਂ ਬਾਅਦ ਬਣਦੇ ਕਿਰਾਏ ਸਮੇਤ, ਭਰਨ ਨਾਲ ਨੋਟਿਸ ਫਿਰ ਵੀ ਰੱਦ ਹੋ ਜਾਂਦਾ ਹੈ। ਅਜਿਹੇ ਤਰੀਕੇ ਨਾਲ ਭੁਗਤਾਨ ਕਰੋ ਜਿਸ ਦਾ ਰਿਕਾਰਡ ਰਹੇ, ਅਤੇ ਰਸੀਦ ਲਓ।

ਭੁਗਤਾਨ ਦੀ ਯੋਜਨਾ ਨਾਲ ਨੋਟਿਸ ਰੱਦ ਨਹੀਂ ਹੁੰਦਾ। ਜੇ ਤੁਹਾਡਾ ਮਕਾਨ ਮਾਲਕ ਤੁਹਾਨੂੰ ਦਸਤਖ਼ਤ ਕਰਨ ਲਈ ਬੋਰਡ ਦਾ ਭੁਗਤਾਨ ਸਮਝੌਤਾ ਭੇਜਦਾ ਹੈ, ਤਾਂ ਪਹਿਲਾਂ ਕਿਸੇ ਕਾਨੂੰਨੀ ਕਲੀਨਿਕ ਨਾਲ ਗੱਲ ਕਰੋ: ਜੇ ਤੁਸੀਂ ਅਜਿਹੇ ਸਮਝੌਤੇ ਅਧੀਨ ਕੋਈ ਕਿਸ਼ਤ ਨਹੀਂ ਭਰਦੇ, ਤਾਂ ਤੁਹਾਡਾ ਮਕਾਨ ਮਾਲਕ ਸੁਣਵਾਈ ਤੋਂ ਬਿਨਾਂ ਬੇਦਖ਼ਲੀ ਦਾ ਹੁਕਮ ਲੈ ਸਕਦਾ ਹੈ।

ਨੋਟਿਸ ਦੀ ਜਾਂਚ ਕਰੋ

• ਤਾਰੀਖ਼। 21 ਸਤੰਬਰ 2026 ਨੂੰ ਜਾਂ ਉਸ ਤੋਂ ਬਾਅਦ ਦਿੱਤੇ ਨੋਟਿਸਾਂ ਲਈ, ਨੋਟਿਸ ਉੱਤੇ ਲਿਖੀ ਤਾਰੀਖ਼ ਤੁਹਾਨੂੰ ਨੋਟਿਸ ਮਿਲਣ ਤੋਂ ਘੱਟੋ-ਘੱਟ 7 ਦਿਨ ਬਾਅਦ ਦੀ ਹੋਣੀ ਚਾਹੀਦੀ ਹੈ। ਉਸ ਤੋਂ ਪਹਿਲਾਂ, ਇਹ 14 ਦਿਨ ਸੀ। ਡਾਕ ਰਾਹੀਂ ਭੇਜਿਆ ਨੋਟਿਸ ਭੇਜਣ ਤੋਂ 5 ਦਿਨ ਬਾਅਦ ਤੋਂ ਗਿਣਿਆ ਜਾਂਦਾ ਹੈ।
• ਫ਼ਾਰਮ। ਇਹ ਬੋਰਡ ਦਾ ਅਧਿਕਾਰਤ N4 ਫ਼ਾਰਮ ਹੋਣਾ ਚਾਹੀਦਾ ਹੈ।
• ਰਕਮ। N4 ਵਿੱਚ ਸਿਰਫ਼ ਬਕਾਇਆ ਕਿਰਾਏ ਦਾ ਦਾਅਵਾ ਕੀਤਾ ਜਾ ਸਕਦਾ ਹੈ, ਅਤੇ ਰਕਮ ਸਹੀ ਹੋਣੀ ਚਾਹੀਦੀ ਹੈ। ਜੇ ਇਸ ਵਿੱਚ ਦੇਰੀ ਦੀਆਂ ਫ਼ੀਸਾਂ, ਵਾਪਸ ਮੁੜੇ ਭੁਗਤਾਨ ਦੇ ਬੈਂਕ ਖ਼ਰਚੇ, ਡਿਪਾਜ਼ਿਟ, ਜਾਂ ਉਹਨਾਂ ਯੂਟਿਲਿਟੀ ਬਿੱਲਾਂ ਵਰਗੀਆਂ ਚੀਜ਼ਾਂ ਦਾ ਵੀ ਦਾਅਵਾ ਹੈ ਜੋ ਤੁਸੀਂ ਵੱਖਰੇ ਤੌਰ ਤੇ ਭਰਦੇ ਹੋ, ਤਾਂ ਹੋ ਸਕਦਾ ਹੈ ਨੋਟਿਸ ਜਾਇਜ਼ ਨਾ ਹੋਵੇ।

ਜੇ ਕੁਝ ਗ਼ਲਤ ਲੱਗਦਾ ਹੈ, ਤਾਂ ਕਿਸੇ ਕਾਨੂੰਨੀ ਕਲੀਨਿਕ ਨੂੰ ਦੱਸੋ।

ਜੇ ਤੁਹਾਡਾ ਮਕਾਨ ਮਾਲਕ ਬੋਰਡ ਨੂੰ ਅਰਜ਼ੀ ਦਿੰਦਾ ਹੈ

ਤੁਹਾਨੂੰ ਸੁਣਵਾਈ ਬਾਰੇ ਕਾਗ਼ਜ਼ ਮਿਲਣਗੇ। ਸੁਣਵਾਈ ਵਿੱਚ ਜ਼ਰੂਰ ਜਾਓ: ਜ਼ਿਆਦਾਤਰ ਸੁਣਵਾਈਆਂ ਔਨਲਾਈਨ ਜਾਂ ਫ਼ੋਨ ਰਾਹੀਂ ਹੁੰਦੀਆਂ ਹਨ, ਅਤੇ ਜੇ ਤੁਸੀਂ ਹਾਜ਼ਰ ਨਹੀਂ ਹੁੰਦੇ, ਤਾਂ ਬੋਰਡ ਤੁਹਾਡੇ ਬਿਨਾਂ ਫ਼ੈਸਲਾ ਕਰ ਸਕਦਾ ਹੈ।

• ਬੋਰਡ ਦੇ ਹੁਕਮ ਦੇਣ ਤੋਂ ਪਹਿਲਾਂ, ਤੁਸੀਂ ਆਪਣੀ ਸਾਰੀ ਬਕਾਇਆ ਰਕਮ, ਨਾਲ ਹੀ ਤੁਹਾਡੇ ਮਕਾਨ ਮਾਲਕ ਦੇ ਖ਼ਰਚੇ ਜਿਵੇਂ ਅਰਜ਼ੀ ਦੀ ਫ਼ੀਸ, ਭਰ ਕੇ ਅਜੇ ਵੀ ਬੇਦਖ਼ਲੀ ਰੋਕ ਸਕਦੇ ਹੋ।
• ਸੁਣਵਾਈ ਵਿੱਚ, ਬੋਰਡ ਨੂੰ ਇਹ ਵਿਚਾਰ ਕਰਨਾ ਪੈਂਦਾ ਹੈ ਕਿ ਕੀ ਤੁਹਾਨੂੰ ਬੇਦਖ਼ਲ ਕਰਨਾ ਬੇਇਨਸਾਫ਼ੀ ਹੋਵੇਗੀ। ਇਹ ਤੁਹਾਨੂੰ ਭੁਗਤਾਨ ਦੀ ਯੋਜਨਾ ਨਾਲ ਰਹਿਣ ਦੇ ਸਕਦਾ ਹੈ।
• ਸੁਣਵਾਈ ਵਿੱਚ ਮੁਰੰਮਤ ਜਾਂ ਤੰਗ ਕਰਨ ਵਰਗੀਆਂ ਹੋਰ ਸਮੱਸਿਆਵਾਂ ਉਠਾਉਣ ਲਈ, ਤੁਹਾਨੂੰ ਸੁਣਵਾਈ ਤੋਂ ਘੱਟੋ-ਘੱਟ 7 ਦਿਨ ਪਹਿਲਾਂ ਆਪਣੇ ਮਕਾਨ ਮਾਲਕ ਅਤੇ ਬੋਰਡ ਨੂੰ ਸਮੱਸਿਆਵਾਂ ਦੀ ਲਿਖਤੀ ਸੂਚੀ ਅਤੇ ਆਪਣੇ ਸਬੂਤਾਂ ਦੀਆਂ ਕਾਪੀਆਂ ਦੇਣੀਆਂ ਪੈਣਗੀਆਂ। ਜੇ ਤੁਹਾਡੇ ਮਕਾਨ ਮਾਲਕ ਨੇ 21 ਸਤੰਬਰ 2026 ਨੂੰ ਜਾਂ ਉਸ ਤੋਂ ਬਾਅਦ ਅਰਜ਼ੀ ਦਿੱਤੀ ਸੀ, ਤਾਂ ਤੁਹਾਨੂੰ ਉਸੇ ਸਮੇਂ ਤੱਕ ਅਰਜ਼ੀ ਵਿੱਚ ਦਾਅਵਾ ਕੀਤੇ ਬਕਾਇਆ ਕਿਰਾਏ ਦਾ ਅੱਧਾ ਹਿੱਸਾ ਵੀ ਆਪਣੇ ਮਕਾਨ ਮਾਲਕ ਨੂੰ ਭਰਨਾ ਪਵੇਗਾ, ਬੋਰਡ ਨੂੰ ਨਹੀਂ, ਭਾਵੇਂ ਤੁਸੀਂ ਇਸ ਗੱਲ ਨਾਲ ਸਹਿਮਤ ਨਾ ਹੋਵੋ ਕਿ ਤੁਹਾਡੇ ਵੱਲ ਇੰਨੀ ਰਕਮ ਬਕਾਇਆ ਹੈ।
• ਸੁਣਵਾਈ ਵਾਲੇ ਦਿਨ ਟੈਨੈਂਟ ਡਿਊਟੀ ਕੌਂਸਲ (Tenant Duty Counsel) ਵੱਲੋਂ ਮੁਫ਼ਤ ਕਾਨੂੰਨੀ ਮਦਦ ਮਿਲਦੀ ਹੈ।

ਜੇ ਪਹਿਲਾਂ ਹੀ ਬੇਦਖ਼ਲੀ ਦਾ ਹੁਕਮ ਹੋ ਚੁੱਕਾ ਹੈ

ਬਕਾਇਆ ਕਿਰਾਏ ਬਾਰੇ ਜ਼ਿਆਦਾਤਰ ਹੁਕਮਾਂ ਵਿੱਚ ਲਿਖਿਆ ਹੁੰਦਾ ਹੈ ਕਿ ਤੁਸੀਂ ਇੱਕ ਤੈਅ ਤਾਰੀਖ਼ ਤੱਕ ਹੁਕਮ ਵਾਲੀ ਪੂਰੀ ਰਕਮ ਭਰ ਕੇ ਹੁਕਮ ਰੱਦ ਕਰਵਾ ਸਕਦੇ ਹੋ। ਉਸ ਤਾਰੀਖ਼ ਤੋਂ ਬਾਅਦ, ਜੇ ਤੁਸੀਂ ਸ਼ੈਰਿਫ਼ ਦੇ ਤਾਲੇ ਬਦਲਣ ਤੋਂ ਪਹਿਲਾਂ ਆਪਣੀ ਸਾਰੀ ਬਕਾਇਆ ਰਕਮ, ਤੁਹਾਡੇ ਮਕਾਨ ਮਾਲਕ ਦੇ ਖ਼ਰਚਿਆਂ ਸਮੇਤ, ਭਰ ਦਿੰਦੇ ਹੋ, ਤਾਂ ਤੁਸੀਂ ਬੇਦਖ਼ਲੀ ਰੋਕਣ ਲਈ ਬੋਰਡ ਕੋਲ ਮੋਸ਼ਨ ਦਾਇਰ ਕਰ ਸਕਦੇ ਹੋ। ਉਸ ਘਰ ਵਿੱਚ ਰਹਿੰਦੇ ਹੋਏ ਤੁਸੀਂ ਇਹ ਸਿਰਫ਼ ਇੱਕ ਵਾਰ ਕਰ ਸਕਦੇ ਹੋ। ਮੋਸ਼ਨ ਅਤੇ ਬੋਰਡ ਦੇ ਸੁਣਵਾਈ ਦੇ ਨੋਟਿਸ ਦੀ ਕਾਪੀ ਤੁਰੰਤ ਸ਼ੈਰਿਫ਼ (ਕੋਰਟ ਇਨਫ਼ੋਰਸਮੈਂਟ ਆਫ਼ਿਸ) ਕੋਲ ਲੈ ਜਾਓ, ਅਤੇ ਕਿਸੇ ਕਾਨੂੰਨੀ ਕਲੀਨਿਕ ਨੂੰ ਫ਼ੋਨ ਕਰੋ।

ਇਸ ਉੱਤੇ ਆਧਾਰਿਤ: ਰੈਜ਼ੀਡੈਂਸ਼ੀਅਲ ਟੈਨੈਂਸੀਜ਼ ਐਕਟ, 2006 (Residential Tenancies Act, 2006), ਧਾਰਾਵਾਂ 37, 59, 74, 78, 82, 83, 191, 204 ਅਤੇ 206; O. Reg. 516/06, ਧਾਰਾ 8.3; ਬੋਰਡ ਦੇ ਨਿਯਮ 19 ਅਤੇ 25; ਬੋਰਡ ਦੀਆਂ ਵਿਆਖਿਆ ਗਾਈਡਲਾਈਨਾਂ 7, 10 ਅਤੇ 11। ਸਰੋਤ: ਰੈਜ਼ੀਡੈਂਸ਼ੀਅਲ ਟੈਨੈਂਸੀਜ਼ ਐਕਟ, 2006 (ਅੰਗਰੇਜ਼ੀ ਵਿੱਚ) · O. Reg. 516/06 (ਆਮ ਨਿਯਮ, ਅੰਗਰੇਜ਼ੀ ਵਿੱਚ) · ਬੋਰਡ ਦੇ ਨਿਯਮ ਅਤੇ ਵਿਆਖਿਆ ਗਾਈਡਲਾਈਨਾਂ (ਅੰਗਰੇਜ਼ੀ ਵਿੱਚ)।